ليه مصر للطيران متقدمش رحلات رخيصة زي فلاي دبي من غير اكل ولا شرب وليك هاندباج سبعة كيلو كنوع من انواع تشجيع السياحة

ليه منعملش تليفريك بين الاهرامات وابو الهول والسياح تشوف الهرم من زاوية عالية كنوع من انواع تشجيع السياحة

ليه منعملش تليفريك فوق دير سانت كاترين طلوعا حتى قمة جبل موسى دون مجهود او معاناة ولزيادة الرواج لزيارة جبل موسى

ليه منعملش فوق البلو هول سكاي دايف وتنزل بيه تحت الميه كنوع من انواع تشجيع السياحة

ليه منعملش حملات ترويجية لل coloured canyon and white canyon ووادى الوشواشى وخليج الفيورد وقلعة صلاح الدين ومحمية نبق ومحمية راس محمد كنوع من انواع تشجيع السياحة

ليه منعملش فيري بوت من جده لمصر الناس تخلص العمرة وتيجي تتفسح في مصر وعلى فكره في دول بتعرض باكيدج العمره معاها السفر لمصر زي اندونيسيا كنوع من انواع تشجيع السياحة

ليه منعملش مهرجان سياحة وتسوق بجد وكل شركات السياحة تعمل عروض وتخفيضات والاعلام يركز عالترويج للسياحة الداخلية اللي بدورها حتحرك الركود

ليه مانديش كل سائح يوصل المطار تذكرة دخول منطقة الاهرامات ببلاش ، والتذكرة يكون عليها اعلانات للمحلات والمطاعم والفنادق اللي حوالين الهرم وتكون الاعلانات مدفوعة الثمن من المعلن فبالتالي التذكرة حتجيب تمنها للدولة والسائح حيروح حيشتري من بازار ولا حيركب جمل ولا حيدخل الهرم من جوا وكله بيشغل كله

ليه منعملش الاتوبيس الدورين المفتوح في القاهرة ويكون مزين بصور الحضارات المصرية المختلفة وياخد السياح في جولة داخل القاهرة او حتى من الاهرامات لهرم سقارة والتيكت بتاعته تتحجز اونلاين

ليه منعملش رحلات سفاري بجانب بحيرة ناصر والسياح يشوفوا التماسيح العملاقة الموجودة هناك

افكار كتير موجوده وعندنا خير مش عارفين نستغله وامارة زي دبي بقوا يجلهم سياح من كل العالم عشان يشوفوا الابهار المصطنع في دبي